Mobile Menu

Reglanan di conducta

1. Reglanan General

Regla 1

E abogado mester comporta su mes di tal forma, cu e confianza den abogacia o den su propio ehercicio di su profesion no ta sufri daño.

Regla 2

1. E abogado mester evita cu su libertad y independencia den ehercicio di su profesion por core peligro.
2. No ta permiti pa un abogado adhudica o ricibi un recompensa o privision, pa logra aporta encargo.

Regla 3

E abogado mester tene na vista cu un areglo amigable hopi biaha ta preferible na lugar di un proceso.

Regla 4

E abogado mester atende e asuntonan encarga na su persona di forma cauteloso.

2. Relacion cu e cliente

Regla 5

Interes di e cliente, no cualkier interes propio di e abogado, ta determinante pa e manera con e abogado mester trata su casonan.

Regla 6

1. E abogado ta obliga di mantene secreto; e mester mantene silencio encuanto particularidad di e casonan cu el a trata, encuanto e persona cu ta su cliente y e caracter y magnitud di su interesnan.
2. Si acaso un ehecucion corecto di e tarea encomenda na su persona segun su huicio ta exigi haci uso di su conocimento obteni di forma externo, e abogado ta liber pa haci esey, asina leu cu e cliente no tin obhecion y segun cu esaki ta conforme cu un bon ehercicio di profesion.
3. E abogado ta impone riba su colaboradornan y personal e mesun atencion pa mantenimento di secreto.
4. E obligacion di mantene secreto ta permanece despues di terminacion di e relacion cu e cliente.
5. Den caso cu e abogado a compromete su mes cu un contraparte pa loke ta confidencialidad, o e confidencialidad aki ta surgi di e caracter di su relacion cu un tercer persona, anto e abogado mester tuma na cuenta e confidencialidad aki tambe pa cu su cliente.

Regla 7

1. E abogado no por encarga su mes cu atende interes di dos o mas partido, si e interesnan di e partidonan aki ta contradictorio, o cu un desaroyo den e direccion aki ta probable.
2. E abogado, cu ta atende interes di dos o mas partido, en general ta obliga pa retira completamente di e caso, inmediatamente ora un conflicto di interes surgi, cu no ta reconciliable di inmediato.
3. E abogado cu a atende den cierto caso interes di dos o mas partido y cu a retira como abogado di un o mas di e partidonan ey, no lo actua mas den e caso ey o den e continuacion di esey contra e partido o partidonan, pa via di ken el a retira.
4. Loke a keda stipula den e incisonan anterior ta di vigor pa tur abogado, cu ta forma parti di e mesun colectivo di cooperacion.
5. No ta permiti e abogado pa actua como contraparte di un anterior cliente o un actual cliente di e mes o di un socio di bufete, salvo den caso stipula den e siguiente incisonan.
6. E abogado por desvia di loke ta stipula den regla 7 inciso 5 solamente, si:
a. e interesnan confia na e abogado, o cu lo ser confia na su persona, den cual e cliente, anterior o existente, a ser asisti o ta ser asisti pa e abogado o un socio di bufete, e interesnan confia na e abogado o e interesnan cu lo ser confia no tabatin o tin relacion cu e asunto ey, y cu un desaroyo cu por surgi di esaki tampoco ta probable,
b. e abogado o su socio di bufete no ta dispone di informacion confidencial di cualkier indole procedente di su anterior cliente o cliente existente, o informacion relaciona cu un caso o informacion cu ta concerni sea e persona o e empresa di e anterior cliente, o ta concerni e cliente existente, cu por ta di importancia den e caso contra e anterior cliente o e cliente existente,
c. tampoco di otro forma a surgi obhecion razonable di banda di e anterior cliente o di banda di e partido, cu a acudi cerca e abogado cu e peticion pa boga pa su interesnan.
7. Si no a cumpli cu loke ta stipula den regla 7 inciso 6 e abogado sin embargo por desvia di locual ta stipula den regla 7 inciso 5 si e partido cu a acudi cerca e abogado cu e peticion pa boga pa su interesnan y e anterior o existente cliente contra ken mester actua, a base di e informacion suministra di manera adecua di antemano, ta bay di acuerdo cu e actuacion manera intenciona den regla 7 inciso 5.
8. Loke ta stipula den e incisonan anterior ta vigente pa tur abogado, cu ta forma parti di mesun colectivo di colaboracion.

Regla 8

E abogado mester pone su cliente na altura di informacion, hecho y acuerdo importante. Unda ta necesario pa preveni mal ententendido, incertidumbre o disputa, e mester confirma informacion y acuerdo importante na su cliente, por escrito.

Regla 9

1. E abogado tambe pa cu su cliente tin e liderazgo den e caso, pero e no por actua contra voluntad evidente di su cliente. Loke e haci, ta sucede bao di su responsabilidad, di cual e no por evadi cu un apelacion riba e encargo ricibi di su cliente.
2. Den caso cu tin diferencia di opinion entre e abogado y e cliente encuanto e manera cu mester hiba e caso y e disputa aki no por keda soluciona den comun consulta, e abogado mester retira.
3. E abogado no por renuncia e encargo duna na su persona na un momento no apropia pa esey, a menos cu e circunstancianan ta haci esey necesario.
4. Un abogado cu ta renuncia su encargo ta keda, a pesar di esey, asina leu cu por rekeri esey razonablemente di su persona, obliga pa tuma medidanan cu ta necesario pa preveni daño pa su cliente.

Regla 10

1. Den suministro di informacion na tercer persona encuanto un caso cu ta o tabata bao tratamento ceca su persona, e abogado ta tuma na cuenta, banda di e interesnan di su cliente, tambe otro interesnan hustifica. E abogado no ta suministra informacion sin permiso di su cliente y ta evita malentendido encuanto e calidad den cual e ta actua.
2. E abogado ta reserva pa cu duna permiso pa inspeccion di e documentonan di un caso.

Regla 11

E abogado cu ta ripara cu el a faya den atende e interesnan di su cliente, mester pone su cliente na altura y mester, si ta necesario, conseha pa pidi conseho independiente.

3. Actuacion dentro di ley

Regla 12

1. No por haci apelacion dentro di ley riba carta y otro notificacion di un abogado na otro, a menos cu interes di e cliente ta rekeri esaki explicitamente, pero den e caso ey no sin consulta previo cu e abogado di e contraparte.
2. Den caso cu e cosulta aki no conduci na un solucion, mester busca conseho di e decano, promer cu dentro di ley haci un apelacion manera describi anteriormente.

Regla 13

Tocante contenido di negociacion di transaccion huridico hiba entre abogadonan no por comunica nada na e hues o instancia na ken su huicio e caso ta someti, sin permiso di e abogado di e contraparte.

Regla 14

1. Den determinacion di e momento di suministra documento na e hues na huicio di ken, o instancia na huicio di ken e caso ta someti, e abogado mester tene cuenta cu e contraparte mester por prepara un reaccion riba esaki suficientemente cuidadoso, esaki tumando na cuenta e reglanan, manera conveni entre e Orden di Abagado di Aruba y e instancianan hudicial na Aruba.
2. Entrega di un alegato ta solemente permiti si e no ta contene mas cu e loke e abogado a alega.
3. Inmediatamente na inicio di e alegatonan mester entrega un copia di e alegato na abogado di e contraparte.

Regla 15

1. No ta permiti pa e abogado den un caso pendiente, acerca e hues na huicio di ken, o e instancia na huicio di ken e caso ta someti, si no ta hunto cu e abogado di e contraparte, y a menos cu ta por escrito y cu envio simultaneo di un copia pa e abogado di e contraparte, y ademas tan pronto cu e abogado ey lo tin suficiente oportunidad pa reacciona riba e anuncionan.
2. Despues cu a pidi un veredicto, no ta permiti e abogado di acudi na e hues sin permiso di e contraparte.

Regla 16

1. Persona cu a ser notifica pa e contraparte como testigo o evidentemente lo ser notifica, e abogado no por scucha nan promer cu e interogacion.
2. Den casonan penal e abogado mester abstene di scucha di antemano testigo, cu Ministerio Publico a cita o yama.
3. E stipulacionnan aki no ta conta pa loke ta regarda e cliente propio y persona den servicio di, o den un relacion particular cu e cliente propio.

4. Relacion entre abogado

Regla 17

Na interes di esnan cu ta busca nan derecho y di abogacia en general abogadonan mester ta en busca di un relacion entre nan, cu ta sosteni pa bon voluntad y confianza.

Regla 18

1. E abogado ta comunica cu un partido tocante un asunto den cual, manera e sa, e persona tin asistencia di un abogado, solamente a traves di e abogado ey, a menos cu e ultimo aki dun’e permiso pa drenta den comunicacion directo cu e partido aki. Esaki ta conta tambe ora e partido referi drenta den comunicacin directo cu e abogado.
2. E abogado, cu ta haci un amonestacion cu consecuencia legal, por haci esaki directamente na e contraparte, cu envio simultaneo di un copia na su abogado.

Regla 19

1. E abogado ta obliga, promer cu e pasa pa tuma medida di ehecucion, pa notifica su contraparte, o si esaki tin asistencia di un abogado, pa notifica e abogado ey di su intencion, esaki tumando na cuenta e directriznan di Corte Comun di Husticia di Aruba, Curaçao, St. Maarten y Bonaire, Saba y St. Eustatius.
2. E abogado ta obliga ademas pa notifica e abogado di e contraparte di su intencion di entama un procedimento sumario.

Regla 20

No ta permiti pa e abogado convoca un abogado o ex-abogado cu ta(bata) inscribi na registro di Corte Comun di Husticia di Aruba, Curaçao, St. Maarten y Bonaire, Saba y St, Eustatius pa duna testimonio di locual el a observa durante ehercicio di su profesion di abogado, promer cu consulta cu e decano. E regla aki ta di aplicacion similar pa colaborador y personal di un abogado o ex-abogado.

Regla 21

1. Si e abogado, den tratamento di un caso, duna un otro abogado un encargo, e mester asumi responsabilidad pa e compensacion y emolumento cu ta toca e otro abogado, a menos cu e pone un condicion explicitamente.
2. Esaki ta conta tambe den caso unda e abogado ta duna asistencia legal pro deo.

Regla 22

1. Si un abogado haya un peticion pa tuma tratamento di un caso cu ta bao tratamento caba di un otro abogado , anto e no ta duna su asistencia sino te despues di consulta cu e otro abogado.
2. Tal consulta no ta necesario, ora el a convence su mes cu e cliente a kibra relacion cu e otro abogado y a paga e factura final pa e caso concerni. Si e factura ey no ta paga, anto e no ta duna su asistencia sin aprobacion di e otro abogado, a menos cu resulta cu e falta di pago ta consecuencia di impotencia.
3. Si ta existi disputa encuanto e suma di e factura, anto e abogado por tuma tratamento di e caso na su encargo, si e tin aprobacion di e decano y bao condicion stipula pa e decano.
4. Den caso cu e interes di e cliente ta haci asistencia necesario, e abogado ta pidi permiso pa esaki di e decano, a menos cu no por consulta esaki na tempo.

5. Reglanan financiero

Regla 23

1. E abogado ta obliga di mantene exactitud y cuidao den asunto financiero.
2. E abogado mester evita haci gasto innecesario. Esaki ta conta igualmente pa e relacion cu e contraparte di e cliente.

Regla 24

1. A menos cu un abogado tin bon motibo pa supone cu su cliente no ta bin na remarca pa asistencia legal pro deo, e ta obliga di consulta cu su cliente na inicio di e caso, y despues cada vez cu tin un motibo pa esey, pa mira si tin termino pa trata di haya asistencia legal pro deo.
2. E abogado lo no pidi ni ricibi, di ningun forma, pago pa tratamento di un caso den cual e ta duna asistencia pro deo, a menos cu ta trata di costonan di procedimento, segun e reglanan vigente pa esey.
3. Ora e cliente ta bin posibelmente na remarca pa asistencia legal pro deo y a pesar di esey ta scoge pa no haci uso di esey, anto e abogado ta obliga di establece esaki por escrito.

Regla 25

1. Den determinacion di su factura e abogado mester, tumando na cuenta tur circunstancia, cobra un salario razonable.
2. E abogado ta liber pa conveni, cu solamente den caso di logra cierto resultado, lo cobra salario.
3. E abogado por conveni tambe, cu e salario lo ta un parti proporcional di e valor cu ta di e resultado cu ta pensa di logra cu su asistencia.
4. E abogado ta structura su factura di tal forma cu e cliente por mira cuanto ta ser cobra como salario y costo di proceso. Den caso cu a ricibi un avance, o a ricibi pago o a haci pago pa e cliente, pa via di costo likida, o di otro indole, e abogado mester menciona e sumanan ey den su factura, o separadamente, y unda ta necesario y posibel, desconta esakinan.

Regla 26

1. Ora un abogado acepta un encargo, e mester discuti e consecuencianan financiero cu e cliente y duna un vista den e manera, y e frecuencia, cu cual e ta bay factura.
2. E abogado mester pone su cliente na altura pareu cu e ripara cu e factura lo sali considerablemente mas halto cu loke el a calcula na inicio pa cu e cliente.
3. Sumanan ricibi cu ta destina na costo di bida di e cliente e abogado no por retene pa haya pago pa su factura.

Regla 27

1. Si e cliente tin obhecion tocante e factura entrega, anto e abogado ta obliga di mustra e cliente riba e regulacionnan existente al caso.
2. Ora e cliente tin obhecion, a base di disputa parcial o total di e factura, pa desconta esaki di e placa cu ta toca su persona, ta deposita e placa te na e suma den disputa cerca e decano.
3. Ora un cliente ta disputa un factura cu a ser desconta di e avancenan cu el a paga, di tal forma cu ta desea restitucion completo o parcial di e avancenan paga, e abogado ta obliga, riba deseo di e cliente, pa entrega e factura pa establece presupuesto. E segundo inciso ta di aplicacion similar.
4. E abogado ta haci solamente uso cauteloso di retene file, pendiente pago di e factura. Si e factura ta obheto di disputa, anto e abogado ta mustra e cliente riba e posibilidad pa deposita e suma factura cerca e decano te ora e disputa keda resolvi.
5. Den cas cu un cliete ta pidi specificacion di e factura, e abogado mester suministra esey. E factura no por resulta di un suma mas halto cu e original.
6. Si esaki no ta conduci na pago y e abogado ta pasa pa entrega su factura pa establece presupuesto, anto e mester pone su cliente na altura di esey mandando un copia di e factura entrega pa establece presupuesto.
7. Pa loke ta e acreencia di e abogado riba su cliente,cu no a ser estableci ainda den corte, e abogado no ta tuma medida conservador y e no ta pidi bancarota, si no ta despues di consulta cu e decano.

Regla 28

1. No ta permiti e abogado pa acepta como pago di su factura algun otro seguridad cu un avance na placa, salvo caso excepcional y solamente despues di consulta cu e decano.
2. E abogado por desconta su factura cu avance y otro placa, cu e ta tene den deposito pa e cliente, e ultimo aki asina leu cu e plcaa aki por ser paga na e cliente sin obhecion y asina leu cu e cliente ta consenti den esaki.
3. Desconta no ta permiti cu placa, riba cual, segun ley no tin posibilidad di embargo.

6. Reclutamento y Publicidad

Regla 29

Ta permiti pa e abogado, sin kita su responsabilidad pa ley, pa haci publicidad, asina leu cu esaki no ta den conflito cu e reglanan di conducta.

Regla 30

E abogado mester percura pa e publicidad cu ta ser haci pa su persona o pa su beneficio, ta di acuerdo cu e cautela cu un bon abogado mester mantene y no ta forma un kiebra cu e empeño di abogadonan pa mantene entre nan un relacion cu ta basa riba bon voluntad y confianza.

Regla 31

No ta permiti pa e abogado haci publicidad unda ta compara su servicionan cu esunnan di otro abogado.

Regla 32

1. No ta permiti pa e abogado haci publicidad a traves di acerca directamente y inividualmente posibel dunador di encargo, cu no ta cliente.
2. E abogado mester abstene di cualkier intento pa haci un cliente di otro abogado su propio cliente.

Regla 33

No ta permiti pa e abogado trece den publicidad cu e tin experticio specialisa, a menos cu e conocimento y experiencia adquiri pa su persona ta probable.

Regla 34

1. No ta permiti pa e abogado den publicidad haci mencion di resultad di casonan o di porcentahe di exito.
2. Salvo consentimento previo di e cliente no ta permiti pa e abogado haci publicidad tocante e particularidadnan di caso cu ta o tabata bao tratamento cerca su persona, encuanto e persona di su cliente o tocante caracter y alcance di su interesnan.

Regla 35

Abogadonan cu ta haci publicidad hunto o cu otronan, mester evita e impresion cu tin caso di colaboracion mas estrecho cu loke ta cuadra cu realidad.

Regla 36

1. E publicidad di e abogado encuanto su tarifa y condicionnan mester ta inequivoco y cla. Pa esey en todo caso mester ta cla na cual servicio ta referi. Di e publicidad mester ta resulta claramente si costonan di proceso y eventual otro costo ta inclui den e tarifa.
2. No ta permiti pa den publicidad limita na duna e prijsnan minimo.
3. No ta permiti e abogado den publicidad pa compara su tarifa y condicionnan cu esunnan di otro abogado.
4. E abogado ta mara na e tarifa y condicionnan publica pa su persona.

Regla 37

Propaganda di e abogado no por duna e impresion cu un otro ta responsabel pa esey.

Regla 38

No ta permiti pa e abogado den propaganda, bao di cual no ta inclui e propio website di e abogado, pa haci mencion di funcion cu e ta eherce, den cual el a keda nombra pa un instancia hudicial, funcion dentro di poder hudicial o funcion cu e ta eherce den Orden di Abogado.

7. Algun Regla Practico

Regla 39

E abogado meser evita den su contactonan cu tercer persona algun malentendido tocante e calidad den cual e ta actua den tal situacion.

Regla 40

E abogado mester abstene di suminisra datonan factual di cual e sa, o al menos mester sa, cu nan ta incorecto.

Regla 41

E abogado no mester expresa su mes, verbalmente ni por escrito, di manera innecesariamente denigrante.

Regla 42

1. Den caso cu e abogado den tratamento di un caso convoca servicio di tercer persona o testigo, e mester para pa e compensacion y emolumentonan cu ta toca su persona, a menos cu e pone un condicion explicitamente.
2. Loke ta stipula den inciso 1 no ta vigente, si e abogado invita un persona pa actua como arbitro o como consehero imperativo.
3. Loke ta stipula den e incisonan anterior tambe ta vigente den caso unda e abogado ta duna asistencia legal pro deo.

Regla 43

1. E abogado mester percura pa e organisacion y ekipamento di su bufete ta di acuerdo cu exigencia di un bon ehercicio profesional.
2. E abogado en general mester ta comunicable durante orario normal di oficina. Den caso di ausencia e ta percura pa un substitucion adecua di su bufete.
3. E abogado ta obliga di mantene exactitud y cautela den asunto financiero.
4. Placa ricibi mester keda entrega mas pronto posibel na esun cu tin derecho riba esaki.
5. Si ta necesario pa e abogado tene placa di su cliente o di tercer persona pa tempo largo, anto e ta obliga di tin e placa aki disponible na tur momento, y percura pa e placa aki no keda confundi cu su propio placa.

Regla 44

1. E abogado cu tin un funcion den cualkier colegio, cu ta encarga cu huicio o resolucion di disputa di otro manera, ta abstene di cualkier envolvimento den un caso, unda e tabata, ta o lo ta ocupa den e funcion ey.
2. E abogado, cu ta forma parti di un colectivo di colaboracion, no ta liber pa ocupa su mes cu un caso, cu tabata evalua o ta ser evalua pa un colegio, den cual un abogado cu ta pertenece na e mesun colectivo di colaboracion ta eherce un funcion, si e abogado aki ta involocra o lo ser involucra den e tratamento pa e colegio.

Regla 45

E abogado por acepta un encargo di un intermediario, cu no ta registra como abogado solamente, si e ta convenci cu e encargo ta duna cu consentimento di e cliente y cu ademas el a reserva e derecho pa na cualkier instante comunica directamente cu e cliente.

Regla 46

1. No ta permiti pa e abogado, sin anuncio previo na e persona cu ken e ta papia, laga un otro persona scucha loke ta papiando na telefon o graba e contenido di e conversacion riba un artefacto di grabacion di zonido.
2. Si un conversacion cu un otro abogado, cu su consentimento, a ser graba riba un artefacto di grabacion di zonido, anto regla 12 ta di aplicacion similar.

Regla 47

Den caso di un investigacion disciplinario o un peticion pa informacion di e decano, cu ta relaciona cu un posibel investigacion disciplinario, e abogado contra ken e investigacion o control ta dirigi, ta obliga di suministra di inmediato tur informacion pidi, sin por invoca su obligacion di mantene secreto, salvo casonan particular. E abogado cu ta considera invoca presencia di un caso particular, ta consulta cu e decano.

Regla 48

Un abogado por laga miembro di su personal, cu no ta registra como abogado, atende asunto solamente ora e ta convenci cu nan tin e capacidad pa haci esey, ora el a limita e tereno riba cual nan por haci esaki y ora esaki ta tuma lugar bao di su supervision. Pa cu e cliente e ta keda responsabel pa tratamento di e casonan y e consehonan duna.

Scroll To Top